2Ki 14 | NdeIBE | STEP | Ngomnyaka wesibili kaJehowashi indodana kaJehowahazi inkosi yako-Israyeli, u-Amaziya indodana kaJowashi inkosi yakoJuda waqalisa ukubusa.

2 Kings 14

U-Amaziya iNkosi YakoJuda

1 Ngomnyaka wesibili kaJehowashi indodana kaJehowahazi inkosi yako-Israyeli, u-Amaziya indodana kaJowashi inkosi yakoJuda waqalisa ukubusa. 2 Wayeleminyaka engamatshumi amabili lanhlanu eqalisa ukubusa, njalo wabusa eJerusalema okweminyaka engamatshumi amabili lafica munye. Unina kwakunguJehowadini, owayevela eJerusalema. 3 Yena wenza okulungileyo phambi kukaJehova, kodwa kwakungafanani lokukayise uDavida. Kukho konke ayekwenza walandela inyathelo likayise uJowashi. 4 Kodwa izindawo zokukhonzela azizange zisuswe; abantu baqhubeka benikela imihlatshelo lokutshisa impepha kulezondawo.

5 Kuthe umbuso usuqinile ezandleni zakhe, wabulala izikhulu ezazibulele uyise owayeyinkosi. 6 Kodwa kasabulalanga amadodana alabo ababulala uyise inkosi, njengokulotshiweyo eNcwadini Yomthetho kaMose lapho uJehova walaya wathi: “Oyise abayikufela abantwababo, loba abantwana bafele oyise; ngulowo lalowo uzafela izono zakhe.”

7 Nguye owanqoba ama-Edomi azinkulungwane ezilitshumi, eSihotsheni seSawudo waze wathumba iSela empini, wayibiza ngokuthi yiJokitheli, okulibizo layo kuze kube lalamuhla.

8 Ngakho u-Amaziya wathumela izigijimi kuJehowashi indodana kaJehowahazi, indodana kaJehu, inkosi yako-Israyeli emqopha esithi, “Woza, uqondane lami ubuso ngobuso.”

9 Kodwa uJehowashi inkosi yako-Israyeli waphendula u-Amaziya inkosi yako-Juda wathi, “Isihlahlana sameva saseLebhanoni sathumela umsedari eLebhanoni ilizwi sathi, ‘Yendisela indodakazi yakho kundodana yami.’ Kwavela isilo eLabhanoni eseza safika sagxobagxoba isihlahlana sameva ngamasondo aso.

10 Ngempela umnqobile u-Edomi ngakho khathesi usukloloda. Ziqhenye ekunqobeni kwakho, kodwa uhlale ekhaya! Kungani uzibizela uhlupho uzibangela ukulwa kwakho njalo lokukaJuda na?”

11 Loba kunjalo, u-Amaziya, kazange alalele, ngakho uJehowashi inkosi yako-Israyeli wahlasela. Yena waqondana lo-Amaziya inkosi yakoJuda bakhangelana ubuso ngobuso eBhethi Shemeshi koJuda. 12 UJuda wachithwa ngu-Israyeli, kwathi amadoda wonke abalekela emizini yawo. 13 UJehowashi inkosi yako-Israyeli wathumba u-Amaziya inkosi yakoJuda, indodana kaJowashi, eyindodana ka-Ahaziya, eBhethi-Shemeshi. Ngakho uJehowashi wasesiya eJerusalema wayadiliza umduli weJerusalema kusukela esangweni lika-Efrayimi kusiya eSangweni leJiko, isibanga esingaba yizingalo ezingamakhulu ayisithupha ubude. 14 Wathatha lonke igolide lesiliva lazo zonke ezinye izimpahla ezafunyanwa zisethempelini likaJehova lasezindlini zenotho esigodlweni waphinda wathumba labantu wahamba labo eSamariya.

15 Mayelana lezinye izehlakalo zombuso kaJehowashi, lakho konke lokuphumelela kwakhe, lempi ayilwa lo-Amaziya inkosi yakoJuda, lokhu akulotshwanga yini egwalweni lwembali yamakhosi ako-Israyeli na?

16 UJehowashi waphumula laboyise, njalo wambelwa eSamariya lamakhosi ako-Israyeli. UJerobhowami indodana yakhe wabusa esikhundleni sakhe.

17 U-Amaziya indodana kaJowashi inkosi yakoJuda waphila okweminyaka elitshumi lemihlanu ngemva kokufa kukaJehowashi indodana kaJehowahazi inkosi yako-Israyeli.

18 Mayelana lezinye izehlakalo zombuso ka-Amaziya azilotshwanga na egwalweni lwembali yamakhosi akoJuda?

19 Bamenzela icebo eJerusalema, wasebalekela eLakhishi, kodwa bathumela amadoda amlandela ayambulalela khonale.

20 Bamthwala ngebhiza bamletha eJerusalema lapha angcwatshwa khona laboyise, eMzini kaDavida.

21 Ngakho abantu bonke koJuda bathatha u-Azariya, owayeleminyaka elitshumi lesikhombisa yokuzalwa bamgcoba ubukhosi bukayise u-Amaziya. 22 Nguye owakha kutsha i-Elathi walibuyisela koJuda ngemva kokuphumula kukayise labokhokho bakhe.

UJerobhowami Wesibili iNkosi Yako-Israyeli

23 Ngomnyaka wetshumi lanhlanu ka-Amaziya indodana kaJowashi inkosi yakoJuda, uJerobhowami indodana kaJehowashi inkosi yako-Israyeli waba yinkosi eSamariya, njalo wabusa okweminyaka engamatshumi amane lanye. 24 Wenza ububi phambi kukaJehova njalo kazange atshiye lasinye sezono zikaJerobhowami indodana kaNebathi, lezo abangela u-Israyeli ukuthi azenze. 25 Nguye owabuyisela imingcele yako-Israyeli kusukela eLebho Homathi kusiya eLwandle lwase-Arabha, njengelizwi likaJehova uNkulunkulu ka-Israyeli, alikhuluma ngenceku yakhe uJona indodana ka-Amithayi, umphrofethi owayevela eGathi Heferi. 26 UJehova wayekubonile ukuthi kwakubuhlungu kanganani kubo bonke abako-Israyeli, izigqili loba ababekhululekile, ukuhlupheka ababekukho; kungekho labani owayengabasiza. 27 Kanti njengoba uJehova wayengatshongo ukuthi uzakwesula ibizo lika-Israyeli ngaphansi kwamazulu, wabahlenga ngesandla sikaJerobhowami indodana kaJehowashi.

28 Mayelana lezinye izehlakalo zombuso kaJerobhowami, konke akwenzayo, kanye lokuphumelela kwakhe empini, lokuthi wathumba njani wabuyisela embusweni ka-Israyeli iDamaseko leHamathi, ayengawe-Yawudi, akulotshwanga yini egwalweni lwembali yamakhosi ako-Israyeli na?

29 UJerobhowami waphumula laboyise, amakhosi ako-Israyeli. UZekhariya indodana yakhe wabusa esikhundleni sakhe.